கைவிடப்படுகிறதா இளையராஜா பயோபிக் படம்

இரட்டையர்களான தேவராஜ்-மோகன் இயக்கத்தில் 1976 ஆம் ஆண்டு வெளியான அன்னக்கிளி படத்தின் மூலம் இசையமைப்பாளராக அறிமுகமானவர் இளையராஜா. இவர் இதுவரை தமிழ், தெலுங்கு, மலையாளம், இந்தி என பல்வேறு இந்திய மொழிகளில் 1,000க்கும் மேற்பட்ட படங்களுக்கு இசையமைத்துள்ளார். அன்று முதல் இன்று வரை இவருடைய இசைக்கு மயங்காதவர்கள் எவரும் இல்லை. தனது தனித்துவமான இசையினால் மொழி கடந்து உலகம் முழுவதும் ஏராளமான ரசிகர்கள் இவருக்குண்டு.

இந்நிலையில், இளையராஜாவின் வாழ்க்கை வரலாறு படமாக எடுக்க அதற்கான பணிகளை கடந்த சில மாதங்களுக்கு முன்பு தொடங்கினர். அதில் நடிகர் தனுஷ் இளையராஜாவாக நடிக்க இருந்தார். படத்தை கேப்டன் மில்லர் படத்தை இயக்கிய அருண் மாதேஸ்வரன் இயக்க இருந்தார். இளையராஜாவும், மும்பையைச் சேர்ந்த தயாரிப்பு நிறுவனம் ஒன்றும் இணைந்து இந்த படத்தை தயாரிக்கப் போவதாக அறிவிக்கப்பட்டிருந்தது. படத்திற்கான முதல் பார்வையும் வெளியிடப்பட்டது. இந்தநிலையில், இளையராஜாவின் வாழ்க்கை வரலாறு பற்றியபடம் கைவிடப்படுவதாக தகவல்கள் வெளியாகி உள்ளது. ஏனென்றால் மும்பையைச் சேர்ந்த தயாரிப்பு நிறுவனம் இந்த படத்திற்கு ஒத்து வராது என படக்குழு முடிவு செய்துள்ளதாக தெரியவந்துள்ளது.

எனவே இனிவரும் நாட்களில் இந்த படம் கைவிடப்படுமா? அல்லது வேறொரு தயாரிப்பு நிறுவனத்திற்கு கைமாற்றப்படுமா? என்று தெரியவில்லை. விரைவில் அதிகாரபூர்வ தகவல் வெளியாகும் என்று எதிர்பார்க்கப்படுகிறது.